Chhod Di Kis Liye Duniya

Chhod Di Kis Liye Duniya

Zakhm-e-Tanhai Mein Khushbu-e-Hina Kiski Thi,
Saya Deevar Pe Mera Tha Sada Kiski Thi.

Uski Raftar Se Lipati Rahi Meri Aankhein,
Us Ne Murh Kar Bhi Na Dekha Ki Wafa Kiski Thi.

Waqt Ki Tarah Dabe Panv Yeh Kaun Aaya Hai,
Main Andhera Jise Samajha Wo Qaba Kiski Thi.

Aansuon Se Hi Sahi Bhar Gaya Daaman Mera,
Haath To Maine Uthaye The Duaa Kiski Thi.

Meri Aahon Ke Zaban Koi Samajhta Kaise,
Zindagi Itni Dukhi Mere Siwa Kiski Thi.

Aag Se Dosti Uski Thi Jala Ghar Mera,
Di Gayi Kis Ko Saza Aur Khata Kiski Thi.

Main Ne Binaiyan Bo Kar Bhi Andhere Kate,
Kis Ke Bas Mein Thi Zamin Abr-O-Hava Kiski Thi.

Chhod Di Kis Liye Tu Ne Muzaffar Duniya,
Justju Si Tujhe Har Waqt Bata Kiski Thi.

Leave a Comment